MUSÈU VIRTUAU

Aqueras pajas que son era prumèra presentacion, coma ua accion urgenta, fàcia aths enjòcs dera celebracion en 2020 deras hèstas deth huec, en consequéncia dera pandemia. Qu’ei ua accion provisòria, coma ua preconfiguracion deth futur projècte deth Musèu Virtuau Prometheus deras Hèstas deth Huec. Aqueth projècte que vòu contribuïr a manténguer viu eth esperit dera hèsta.
Que vos explicam eths grans trèts de coma serà eth Musèu Virtuau.

fête continue

ETH PROJÈCTE

Qu’ei previst qu’eth sia acabat en 2022. Qu’ei impulsat peth projècte Prometheus e finançat per Interreg POCTEFA e peras entitats que hèn partida deth Collectiu. Eth esperit dera hèsta qu’ei present en cada vilatge, en cada comunautat… e que’u cau víver ! Mès a travèrs deth musèu, que poiram tornar víver un shinhau eth esperit dera hèsta.

Un musèu participatiu. Eth element eth mès remercable deth projècte qu’ei que serà un projècte participatiu, coma un musèu “wiki”, bastit dambe era vòsta collaboracion. Un musèu que compderà sus era participacion deras comunautats halhairas e que vos demanderà d’aportar materiaus, documentacion, fotografias, videòs, testimoniatges . . .

Un musèu entath futur. Eth musèu serà pas solament ne ua paja wèb, ne un arrecuelh de documents. Que serà un musèu entà sauvar era memòria dera hèsta, dambe eras navèras tecnologias qu’ajudan entara continuitat dera hèsta.

Un musèu en cinc lengas. Catalan, Francés, Castelhan, Occitan e Anglés.

Ua platafòrma entara collaboracion territoriala.

photo-Durro
© Sergi Ricart (Arxiu del Patronat de la Vall de Boí)

ESPACIS

Era exposicion d’arreferéncia “Huecs”. Era exposicion virtuala principala que presenterà era importéncia deth huec enas societats (eth huec coma simbèu de vita, mès tanben un danger que cau controtlar) e per totes eths larèrs e vesiaus pirenencs. Eths petites vilatges pirenencs qu’an lutat pendent sègles entà adaptà’s ath mieilòc naturau e víver deras suas ressorgas (eth bestiar, era husta, era industria, eth torisme…), e que s’an amassat ath entorn dera casa, era vesiau e era vath coma espacis d’organizacion sociala. En aquestes vilatges, eras hèstas qu’an mercat eth ritme deth son calendari, dera sua vita, dera sua integracion sociala e comunautària. Era hèsta deth huec que compòrta un long procediment de preparacion, dambe diferents rituaus qu’an denominacions diferentas (falles, haros, halhars, hars, halhas). Era exposicion qu’expliquerà era hèsta, mès sustot qu’expliquerà ce quin e’s viu, ce quin eras gents deths vilatges pirenencs s’esmàven cada an entara sua celebracion. Entà aquò, que balherà era paraula aths sues protagonistas : aras comunautats halhairas, aras gents deths vilatges e deras vaths pirenencs. Que s’i parlerà deth passat dera hèsta, mès sustot de tot eth son present e de ce quin a cambiat, dambe eth temps.

Ua hèsta, uns quantes vilatges. Per tant que i aja elements comuns, cada hèsta qu’ei unica. En mès d’ua carta deths vilatges a on e’s celebra era hèsta, dambe documentacion fotografica e de videòs, que i aurà espacis dedicats a exposicions deras hèstas d’uns quantes vilatges, vaths, arregions o païses.

Viu era hèsta. Era hèsta que non pòt èster viscuda sonque peths vilatges, en tot participar ath vertader esperit dera hèsta. Mès eth Musèu que vos herà víver era hèsta a travèrs ua immersion virtuala, peras suas celebracions e rituaus.

Exposicions temporàrias. Coma tot musèu, qu’auram exposicions cambiaderas. Que presenteram objèctes, mès tanben testimoniatges, arreportatges, celebracions.

Eth musèu deths mainatges. Que i aurà ressorgas didacticas, condes virtuaus, materiaus pedagogics, maletas didacticas. Ressorgas entaths gafets, entaras familhas, e entaras escòlas. Entà ajudar ara transmission dera hèsta de cap aras navèras generacions.

soliel

PROJÈCTE PROMETHEUS

Eth projècte Prometheus “Hèstas deth huec deths solsticis deths Pirinèus” (EFA309/19) qu’ei coordonat pera Cadièra Educacion e Patrimòni Immateriau deths Pirenèus dera Universitat de Lleida (UdL),e dambe sèt autes partenaris :

  • eth Governament d’Andòrra
  • eth Departament de Cultura dera Generalitat de Catalonha
  • eth Conselh Generau d’Aran
  • eth Patronat de Promocion Economica dera Diputacion de Lheida
  • era Universitat de Barcelona
  • era Universitat de Perpinhan-Via Domitia
  • eth Centre Internacionau de Recèrca e Documentacion Occitanas – Institut occitan de cultura (CIRDOC-Institut Occitan de Cultura)

Damb un còst totau d’1 045 729,10 €, qu’ei finançat dambe 670 344,42 euròs peth hons FEDER dera Union Europenca.

Demèste eras accions principalas deth projècte, que deu durar dus ans, que i a :

  • era creacion d’un musèu virtuau
  • ua aplicacion telefonet destinada a divulgar e a botar en valor aqueth patrimòni culturau immateriau dera umanitat, de cap a associacions, entrepresas culturalas e particulars
  • era recèrca e documentacion sus era hèsta
  • un kit de comunicacion, de cap aths organismes e entitats localas religadas ath món halhaire
  • era elaboracion de materiaus pedagogics innavants en aubiatge deras TICs, de cap aths establiments primaris e segondaris en occitan, catalan, castilhan e francés
  • era celebracion d’un simpòsi internacionau sus halhas, haros, hars e halhars
  • era possibilitat de botar en camin estudis superiors transfronterèrs especializats en patrimòni immateriau deths Pirinèus
photo-falles-sant-julia
Els Fallaires Lauredians roden dues falles alhora. Fons Comú Sant Julià de Lòria.

©2020 Prometheus Museum

Log in with your credentials

Forgot your details?