La Pobla de Segur

Per tant que sian en Pallars Jussà, eras halhas de La Pobla de Segur que segueishen pr’aquò eth modèle dera halha dita ribagorçana, era mès utilizada ena major part deths vilatges dera Ribagòrça catalana e aragonesa. Mès era halha de La Pobla qu’ei mès longa pr’amor eras halhas que i son baishadas sense hèr ua corsa. Era baishada deras halhas qu’arrepuja aras annadas cinquanta, imaginada dab era ajuda deth Esbart Dançaire de La Pobla entà promòver era vila.

Eth 17 de junh, eth dia dera patrona de La Pobla (era Vièrges dera Ribèra) a cinc oras dera vrespada eths halhaires que desfilan dab eras suas halhas per tot eth vilatge. Que visitan prumèr eras arresidéncias e eras maisons de retrèta de La Pobla de Segur e après, que passan peras carrèras principalas dinc a arribar ath pè dera montanha de Santa Madalena. Aquiu eths halhaires qu’atacan era pujada cap a d’aquera montanha de tres cents mestres de desnivèu e de 810 m de haut. Aquiu haut, que demòran eth cocar deth solelh entà ahlamar eras halhas e baishar dinc ath pè dera montanha, on eras eretèras les demoraràn. D’aqueth temps, en vilatge, eth desfilat deras eretèras que comença deth madeish endret qu’eth desfilat deths halhaires mès que son acompanhadas peths gigants e peths capgròssis e era gent deth vilatge, dab eth vestit tradicionau d’eretèra, dinc ath pè de Santa Madalena, on demoraràn eths halhaires.

D’aquiu-delà, que comença eth desfilat principau, dab eths halhaires, dab eras halhas ahlamadas, que s’ajustan aras eretèras, en fila de dus parelhs acompanhadis pera cobla [grop de musica tradicionala], pera mainada e peth public. Un còp arribadis ena plaça, eths halhaires que lançan era halha en un huec atuperadís e popular e que tornan dab era sua parelha, amassa dab eths autis deths coples e era gent deth vilatge  que s’i vòu ahíger, que dançan era sardana dera Pobla de Segur.

Qu’ei tanben plan tipic que, just abans de dançar era sardana, eth cople a punt de maridà’s que i pòrte un drapèu, en tot arrecitar un verset popular dera Vièrges dera Ribèra. Dempús 2018, que s’an eliminat eths arròtles de genre dera hèsta e d’ara-enlà autant eths òmes coma eras hemnas pòden èster halhaire/halhaira o eretèr(a).

Organizator : Associació Cultural de Fallaires i Pubilles de la Pobla
Entà’n saber mès : https://www.lapobladesegur.cat/ca/festa_fira/falles/
Corrèu : fallaires.pobla@gE-mail.com
Tel. Comuna : 973680038

Entà’n saber mès :
Riart, O. i Jordà S. (2012). “Catalogació de les falles al Pirineu. Descripció dels processos i elements fallaires”, Revista d’Etnologia de Catalogne, nº38, 162-173.

Fotos e Videos

Baishada simbolica de halhas dera Pobla de Segur 2021
https://www.youtube.com/watch?v=8TDf_4JrPp0&ab_channel=PallarsDigital

Pallars TV. halhas La Pobla 2015
https://www.youtube.com/watch?v=J3oZWbydV6s

Baishada de halhas La Pobla 2016
https://www.youtube.com/watch?v=Dj2KZXiSCjE

Passa-carrèra deths halhaires, 2018. La Pobla de Segur. Fotografia : Mbeckmac. Creative Commons Attribution-Share Alike 4.0 International license. Commons)

Passa-carrèra deras eretèras, 2016 La Pobla de Segur. Fotografia : Mbeckmac. Creative Commons Attribution-Share Alike 4.0 International license. Commons)