Era hèsta qu’ei era deths vilatges

En territòri pirenenc, fòrça identitats diferentas que viven còsta còsta. Que son sustot eras hèstas que permeten aquera reafirmacion deths liaders locaus e deth sentiment d’apertenéncia. Eras falles, hars e halhars, de ger en aué, que serveishen entà  mercar era sua identitat locala. Era casa e eth vilatge que horen, de bèth temps a, elements honamentaus deth paisatge e dera gestion deras arresorgas economicas. Que mos cau enténer eras hèstas deth huec en aqueth contèxte reïvendicacion dera localitat a travèrs eths diferentis elements simbolics deth huec. Cada vilatge qu’arreconeish era sua hèsta coma pròpia, coma diferenta dera deths vilatges vesins.

Mès enlà d’aquera identitat locala, en eths Pirenèus, que trobam diferentas identitats on era hèsta estèc utilizada o reïvendicada coma element d’identitat nacionala. En aqueth territòri de montanha, que s’i tòcan un hèish d’identitats diferentas, de caractère regionau, nacionau e estatau, e eras hèstas qu’estèren vistas coma un element de reïvendicacion deths diferentis territòris, que hussa era identitat andorrana coma estat, o d’identitats catalana, aragonesa o occitana.

En fòrça vilatges, que s’an creat associacions halhairas que son vengudas eth element principau entà organizar era hèsta, coma ara a Isil (creada el 1991), La Pobla de Segur o Andorra la Vella. Aquiu, eth arròtle deras associacions qu’estèc essenciau entà assegurar era contunhetat dera hèsta o alavetz era sua relança. Eras associacions que s’ocupan dera organizacion deras hèstas mès tanben d’assegurà’n eths cambiaments necessaris entà aconformar-las ara societat d’aué. Dempús 2009, arrepresentants deras diferentas associacions e deras comunas on e’s celèbran hèstas que hèn ua trobada annau a on debaten deths aspèctes basics entà organizar eras hèstas, escambiar eras coneishenças e eras experiéncias deths diferentis vilatges implicadis.

Que hèn taben activitats tecnicas e ludicas. En 2019, ara Trobada celebrada a La Pobla  de Segur, dab era collaboracion dera Cadièra d’Educacion e Patrimòni Immateriau deths Pirenèus dera Universitat de Lhèida, que’s decidèc era creacion d’ua Coordinacion deras Hèstas deth Huec dab eth objectiu de manténguer e potenciar era hèsta, dab arrepresentants deras entitats halhairas de Catalonha, d’Aragon, d’Occitania e d’Andòrra.