Eras hèstas deth huec deths solsticis

Basicament, que podem parlar de tres granas fòrmas de celebracion :

1) Eras halhas que son ahlamadas ath haro e que son baishadas ath vilatge per un grop de halhaires, en un percors mès o mens long, en tot dessenhar ua sèrp ondejant ath penent dera montanha. Ath vilatge, que demòra eth rèsta dera populacion entà ahlamar mès de halhas o entà alugar un halhar mès gran o un dusau haro. Qu’ei eth modèle mès frequent en Catalonha e Aragon.

2) Eths haros e eths hars o halhars (brandons), a on era hèsta se celèbra ath torn d’un tronc preparat quauques mesis o dinc a un an abans, qu’ei alugat era net dera hèsta. Qu’ei eth modèle predominant en Occitania, en tot includir era Val d’Aran. Era celebracion que s’articula ath torn dera cremada en un camp o ena plaça d’un vilatge. Aquesta halha giganta qu’ei coneguda generalament coma brandon, terminologia d’origina francesa, mès que s’emplegan tanben d’autis tèrmes occitans coma eth halhar en parçan de Luishon, eth har en d’autas parts de Comenge e de Coserans, eth haro / taro ena Val d’Aran.

3) Eras halhas que s’alugan en vilatge e que’s hè un passacarrèra peth vilatge, coma en Andòrra. En bèris vilatges, coma Andorra la Vella, eras halhas que desfilan e que’s hèn tornejar en tot crear bòlas de huec. Tornejar eras halhas que’s hè tanben en bèris vilatges deths modèles anteriors, coma a Les o Saúnc.

Que’s celèbran eras halhas e eths hars e halhars en territòris a on se parlan diferentas lengas (catalan, occitan, castelhan, francés, aragonés). Pr’amor d’açò, e segon eth biais que’s hèn, qu’arreceben denominacions diferentas.

• La Cremada de Falles (Andòrra)
• Les Falles (Isil, Saünc, Bonansa)
• Baixada de Falles (Vilaller, Montanui, Aneto, Castanesa, Senet, Alins)
• Córrer les Falles (Erill la Vall, Boí, Barruera, Durro, Taüll, el Pont de Suert, Casós, Llesp)
• Corré las Fallas (Les Paüls)
• Festa de la Falleta (San Chuán de Plan)
• Las Fallas (Bonansa)
• Le Brandon de la Saint-Jean (et de la Saint-Pierre) (Bagnères-de-Luchon)
• Crema deth Taro (Arties)
• Crema deth Haro e des Halhes (Les)
• Quilhadeth Haro (Les)
• La Biga (Senet)
• La Fia-faia (Bagà i Sant Julià de Cerdanyola)
• Falles de la Verge de la Ribera (la Pobla de Segur)
• Brandon, Eth Halhar, Eth Haro, Eth Har, Era Halha (Occitania)